第十一回
101. 鼓時鐘
甲去乙的厝，佇客廳看著一個鼓。
甲：「鼓是佇創啥物？」
乙：「彼兮不是鼓，是時鐘。」
甲不相信。乙就出力拍鼓。
隔壁：「半暝三點，佇哢啥物siau鼓！」
102. 雨蠅
阿花發現老翁最近佇研究雨蠅。有一早起，伊看著一個罐仔有三隻雨蠅，另外一個有兩隻。前者貼一張紙寫：「公兮」；後者：「母兮」。伊感覺誠奇怪就問in翁，是安怎分「公兮」及「母兮」。In翁講，三隻是佇啤酒罐掠兮，令外兩隻是佇電話掠兮。
103. 不識己老
阿雪去看牙科醫生，等醫生兮時陣，看著掛佇壁頂兮高中畢業證書。學校是頭城高中，畢業生兮名字是林勇，畢業年看boe足清楚，但是好像和阿雪同年。阿雪同班兮林勇誠豔頭，阿雪內心暗暗愛伊過。入去看醫生兮時陣發現，醫生禿頭，頭毛全白，面部又閣全皺紋，紋線也誠深，又閣穩龜，確是LKK。阿雪想講這兮人絕對不是伊的同班同學，伊同班同學無應該遮尼(cha-ni) 老。
醫嘴齒後，阿雪問醫生：「您敢是xx年頭城高中畢業兮？」醫生：「是。」阿雪講：「安尼，咱同班。」醫生：「您是教叨一科兮？」
104. 林肯是啥物人暗殺兮
老師：「阿文，林肯是啥物人暗殺兮？」
阿文：「老師，不．．．是我。絕對．．．不是我。」
老師誠受氣，叫電話去阿文家。
老師：「李太太，lin 阿文連啥物人暗殺林肯兮都不知，又講不是伊暗殺兮。」
李太太：「老師，歹勢，阮 阿文無巧阮知影，不拘伊誠老實，伊若講不是伊。都是不是伊。」
老師閣卡氣，無愛閣和李太太講，就請李先生聽電話。李先生聽了後，就請老師等一下。無外久，老師聽阿文兮哭叫，然後李先生猶閣回來電話邊。
李先生：「老師，阿文誠害，無拍boe講實在話，伊完全承認林肯是伊暗殺兮。」
105. 爬山
一對熟悉無外久兮男女朋友，做伙去旅行。因為無先預約，暗時煞找無旅館。最後勉強找著一間房間，房間內也干單有一張眠床。In 決定用捲好兮床巾做「楚界」，一瞑無代誌。隔日透早，男兮招女兮去爬山，女兮卡伊拒絕。女兮講：「一條床巾都爬boe過，閣想欲爬啥物山？」
106. 佇電影院講話
電影已經佇做啊，兩個查某囡仔閣繼續講話。坐佇後面兮紳士細聲講：「拜托咧，我無聽著。」其中兮一個查某囡仔應講：「阮刁(tiau)工講足細聲，古意無愛互你聽兮。」
107. 著(tio)賊偷
佇厝兮某，拍電話互伊出差兮翁。
「代誌大條啊，咱厝著賊偷，即馬警察來佇咱厝，伊愛知影咱phan見(丟掉)啥物。你甘有啥物欲交代？」
丈夫誠緊張講：「我有幾千塊放(khn)佇，咱房間兮鏡後。」
某：「甘猶閣有？」
丈夫：「猶閣有幾拉百塊，放佇我三雙兮高爾夫鞋底。」
某：「甘安呢耳耳(nia-nia)？」
某一直追落去。結果發現古意兮丈夫，有四個偷藏錢兮所在。
108. 天真兮Johnny(一)
老師在班上問：「家己承認是憨(gong) 兮，企(khia, 站)起來。」
等誠久無動靜以後，Johnny 道企起來。
老師：「Johnny, 是安怎你想講你憨？」
Johnny:「不是，我想講老師無伴。」
109.天真兮Johnny(二)
Johnny及爸爸去馬場買馬。伊看爸爸小心摸每一隻馬，由腳、腿、臂摸到胸坎。
伊問爸爸：「是安怎愛摸遐爾(hia-ni)詳細？」
爸爸：「欲買一隻好馬都愛安爾。」
Johnny:「爸爸，我想郵差欲買媽媽。
110. 是工作抑是娛樂？
三個教徒在討論安歇日，是不是會駛做房事。問題是房事倒底是工作抑是娛樂？其中兮一個，想出一個每一個人都同意兮答案─會駛，是娛樂。伊的理由是：如果房事是工作，伊'n某道叫下女去做啦。
111、進口稅
一位貴婦人來美國七桃，買一件誠貴兮吹髮器，伊想欲走進口稅。佇機場伊請一位也欲去台灣的神父，替伊帶。神父講可以，不拘伊襪(boe)使講白賊話。貴婦人講無要緊。佇台北機場的海關，官員誠客氣問神父：「聖袍內底甘有帶，需要報關稅兮物件？」神父應講：「腰以上無，腰以下帶一枝不捌用過兮，女人專用兮物件。」
後記
我已經將所知影兮「自認為好笑」兮笑話，用台文寫完。其中當然有幾個笑話，是你笑boe(衣末)出來兮，這是因為每一兮人兮「歡笑細胞」無像，若無都是因為我的台文寫無好。如果是後者，請讀者諒解。
起初我不知，我會凍寫一百十一個笑話，因為我的笑話是一邊寫，一邊佇增加。不然，我會將我的題目定為〈一百十一個笑話〉抑是〈笑話一百十一個〉，因為我對數字有偏愛，雖然〈吳老講笑〉也是好題目。
平常時，我有收集「自認為好笑」兮笑話兮習慣，這並不是我對收集有興趣，而是因為我愛講笑話─應該講是我愛看別人的笑容。別人的笑容對我來講是「新鮮」兮空氣，這空氣互我過好日子。我講笑話兮習慣，有互我及聽我講笑兮朋友，免於「憂鬱症」兮效用。
人有佇講：「不管外『妻操』兮宴會，都有散會兮時陣。」我這〈吳老講笑〉也無例外，我欲向讀者講「再會」兮時間已經到啦。
再會！親愛兮讀者！希望「憂鬱症」已無佇你兮身軀邊。
吳木盛
|
